تعلم التوزيع الموسيقى : اشكال الموسيقى المختلفة والالات المستخدمة فى كل شكل

الدرس الثانى : اشكال المزيكا المختلفة والالات المستخدمة فى كل شكل

تعلم التوزيع الموسيقى باحتراف

النهاردة درسنا فى سلسلة دروس تعلم التوزيع الموسيقى باحتراف عن اشكال المزيكا المختلفة والالات المستحبة لكل نوع .

نبدأ باول نوع:

أ- السلو دانس Slow Dance :

ودى بعض امثلة الاغانى عن الشكل ده

1-      لانك معايا – ساموزين

2-      قرب كمان – تامر حسنى

3-      انكتبلى عمر – شيرين

4-      بيت كبير – تامر عاشور

5-      جوا فى قلبى – هشام عباس

وكتير جدا دى بعض امثلة على الشكل ده من المزيكا الشكل ده ياجماعة بالرغم من انه بطىء وممكن تستخدم فيه الات كتير الا انه من الانواع الصعبة نسبيا وده بيرجع للحن والتوزيع لازم مايكونش دوشة فى نفس الوقت .

هديكوا امثلة على الالات الممكن استخدامها واسلوب لعب كل اله على شاكلة كورد او سولو اوريفليكشن اللى هى المردات على الغنى .

الالات المستحبة لموسيقى السلو دانس Slow Dance :

Learn music 

1-      بيانو "Piano"

طبعا البيانو من الالات الاساسية فى الشكل ده وممكن يلعب كوردات على شكل اربيجيو او رتم وفنفس الوقت تقدر تعلب صولو ومردات من اوكتاف اعلى .

اشكال المزيكا المختلفة والالات المستخدمة فى كل شكل

2-      وتريات "Strings"

الكمانجات او الوتريات ايضا من الالات الاساسية فى هذا النوع من الموسيقى ولكن لازم تكون حريص وانت بتوزع خطوط الوتريات لان زى ماهى بتضيف جدا للتوزيع ممكن بردو تبوظو وتخليه دوشة وغالبا الموزعين المحترفين مش هما اللى بيوزعو وتريات فى الاغانى لكن بيبقى حد محترف كمانجات وقائد اوركسترا وهو اللى بيكتب نوتة الوتريات وبيكون غالبا السيكشن بيتكون من 6 كمانجات و2 تشيلو و1 فيولين اذا امكن .

شكل الجيتار فى الاغانى

3- جيتار "Guitar"

طبعا الجيتار ليه اشكال واصوات كتير ولكن فى هذا النوع من الموسيقى بالاخص Slow Dance ممكن الجيتار يلعب كذا شكل ,فالجيتار الفولك او Acoustic Guitar ممكن يلعب كوردات على شكل اربيجو , والسبانيش جيتار او Classical Guitar ممكن يلعب رتم مع الدرامز مثلا ويلعب صولو ويلعب ريفلكشن او مردات والاليكتريك جيتار ممكن يلعب باور كوردز بالفلتر الديستورشن وده غالبا بيبقى فى السنيو او الحتة اللى فيها حماس فى الاغنية ويفضل يكون مع الدرامز .

كن موزع موسيقى محترف بسهولة

4- بيز جيتار Bass Guitar""

نقدر نقول ان البيز جيتار هو البنية التحتية للاغنية واللى غالبا موزعين موسيقيين كتير بيبدأوا بيه التوزيع والبيز جيتار بيعتمد على الكوردات المحطوطة للحن اللى انت شغال عليه ويعتبر مفيش اغنية بتخلى من البيز جيتار الا اغانى بسيطة زى مثلا اغنية غلطة عمرى عمرو مصطفى دى اغنية توزيعها الموسيقى بيتكون من بيانو فقط لا غير .

تعلم التوزيع الموسيقى بطريقة سهلة

5- درامز "Drums"

وفى شكل مزيكة السلو دانس تحديدا مش لازم يبقى فيه درامز او اى اله ايقاعية بشكل عام ولكن غالبا بنستخدم درامز ولكن مش حى او لايف ممكن تكون ايقاع يليق على شكل الاغنية وفنفس الوقت مايكونش اجريسيف اوى او دوشة لا يكون صوته رقيق بحيث انه يحطك فى المود الرومانسى اللى انت شغال عليه وده بيرجع لاختيارك للاصوات حاول مثلا تختار Kick Drum تكون بيزى او غليظة ويفضل انك تختار عليها Rim  مش Snare لان السنير غالبا بيكون صوته قوى وبيدى على روك اكتر منه رومانسى والريم دى بتتلعب بستيك الدرامز بس على حرف السنر بشكل مايل ممكن تبحث فى جوجل او يوتيوب عن  Rim Shot وطبعا مش شرط تستخدم درامز كامل ممكن تستخدم اى اله ايقاعية تحب ممكن مثلا كونجات بس Conga .

دى طبعا مش كل الالات اللى ممكن تستخدمها ممكن تستخدم الات كتير الكترونية مثلا ولكن دى الالات الاساسية وكل موزع وليه خلطته حسب خبراته والداتا بتاعته وسمعه ومتابعته للمزيكا بشكل عام.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

النوع الثانى :

ب- ريجاتون Reggaeton :

               ودى بعض امثلة الاغانى عن الشكل ده

1- روحى مرتحالك – عمرو دياب .

2- بقت عادة – محمد حماقى .

3- مابلاش - شيرين .

4- فاكرها سايبة - كريم محسن .

5- هلا هلا - عمرو دياب .

الشكل ده يا جماعة لو سمعناه هنلاحظ ان هو نفس شكل الملفوف المصرى ولكن اتغرب شوية او استخدم فيه الات غربية خارجة عن الالات الشرقية كالدف والطبلة وغيرهم .

الالات المستحبة لموسيقى الريجاتون Reggaeton :

1- جيتار Guitar

ممكن يلعب كوردات ورتم وصولهات ومردات ويفضل لو يكون جيتار كلاسيك اللون ده من المزيكا مش بيبقى مليان اوى فبيعتمد جدا على الجيتار .

2- اليكتريك بيانو Electric Piano

صوت البيانو الاليكتريك بيضيف جدا للون ده وهو ممكن يلعب كوردات مع شوت السنير او مع ضربة سنير الدرامز وممكن يلعب اربيجيو مع الغنى .

3- اصوات الكترونية synthesizer

الاصوات دى كتير جدا بالاف ومقدرش اقولك اختار صوت معين كل موزع وليه ذوقه ولكن هتلاقى اصوات كويسة جدا فى نيكساس Refx Nexus و Omnisphere ودى ممكن تلعب اربيجيو وتلعب مردات ودى بتملى التوزيع وبتخلى شكله شيك جدا بس لو لعبتها صح .

4- درامز Drums

طبعا الدرامز اساسى فى اللون ده بس مش لايف بردو اصوات كمبيوتر وفى نوع الريجاتو الدرامز مابيكونش دوشة بيبقى فاضى الى حدا ما كلما كان اختيارك للصوت صح ومهرمن مع باقى الالات مش هتحتاج تملى اكتر وهيديك صوت شيك جدا .

5- البيز جيتار Bass Guitar

طبعا البيز زى ماقولنا اساسى فى كل الاشكال وهو بيطعم الموضوع جدا بالذات فى شكل الريجاتون وطريقة لعبه مابتبقاش صعبة بتنزل مع الكيك وممكن تعمل كتمة مع السنير .

دى طبعا مش كل الالات اللى ممكن تستخدمها ولكن دى الاساسية .

هنكتفى النهاردة بالشكلين دول وان شاء باقى الاشكال جارى تحضيرهم وياريت يا جماعة التمرين على الاشكال دى  :)

إقرأ المزيـــد

تعلم التوزيع الموسيقى : ما الذى تحتاجه لكى تكون موزع موسيقى

كيف تكون موزع موسيقى بسهولة

تعلم اسس التوزيع الموسيقى بسهولة

بسم الله الرحمن الرحيم

........................................

والنهاردة ان شاء الله هنتكلم عن اول حاجة هى :

الأدوات :

 انت محتاج ايه او يبقى عندك ايه عشان تبقى موزع محترف:

اولا ياجماعة انا مش كاتب محترف ولا بعرف انظم وارتب الكلام بس كل الحكاية ان انا لقيت ناس كتير اوى نفسها تتعلم التوزيع الموسيقى واسراره فأنا حبيت اشارك بالعلم المتواضع اللى عندى.

..................................................................................

اولا البرنامج او السيكونسر : طبعا لما بنيجى نتكلم عن التوزيع الموسيقى يبقى اكيد هنبقى عارفين ان احنا بنوزع على برنامج مضيف بنرتب عليه التراكات وبنرسم او نسجل عليه جمل الميدى بتاعتنا

طبعا البرامج كتير جدا وكل واحد بيرتاح فى برنامج معين وعلى رأسهم

الفروتى لوبس      Fruity Loops

البروتولز                 Pro Tools 

الكيوبيز                       Cubase

يعنى دول تعتبر اهم واشهر البرامج وطبعا لازم تفهم ان انت هنا مش عشان اعلمك تستخدم البرامج دى انت عشان تتعلم تبقى موزع موسيقى محترف 

مش هتلاقى اكتر من الدروس عن البرامج دى على اليوتيوب وللعلم البرامج دى اصواتها مش احترافية للدرجة فيه شركات مديولات وسامبلز عندها اصوات جبارة

 وانا فى رأيى افضل برنامج كسيكونسر للتوزيع وليس للتسجيل

هو الفروتى لوبس من ناحية السهولة والسلاسة فى رسم الايقاعات وحاجات كتير انت هتفهمها لو جربت وطبعا لازم يكون عندك كارت صوت كويس الى حد ما على الاقل يكون فيه ازيو Asio .

انت مش محتاج كارت صوت جبار لان انت موزع مش مهندس صوت يعنى بمعنى اصح مش هتاخد تيكا او تسجل اصوات عندك الا لو انت عندك الامكانية .

...................................................................................................

ثانيا المونيتور: اهم حاجة للموزع يا جماعة هى السماعات او المونيتور استوديو دى هى اللى بتخليك تسمع صوت حقيقى ونقى او بمعنى اصح بيكون الايكولايزر بتاعها فلات يعنى الشركة المصنعة للسماعات مش بتضيف اى محسنات للسماعات هى عايزة تسمعك صوت حقيقى وواضح ونقى وانت اللى تتحكم فى الصوت ده بمزاجك حسب استايل او الجو بتاع التراك اللى انت شغال فيه .

لازم تبقى فاهم ان الفرق بين المونيتور استوديو والصب هو ان الصب بتبقى الشركة ضايفة محسنات للصوت يعنى بتزود البيز وبتفتح الصوت عشان المستمع يتمتع لكن المونيتور بيسمعك صوت حقيقى للخامات اللى انت شغال بيها .

...................................................................................................

ثالثا الميدى كيبورد: الميدى كيبورد او الاورج مهم جدا للموزع اها انت ممكن تشتغل بالرسم على الفروتى لوبس لكن الاورج يا جماعة بيضيف كتير غير انه بيسهل عليك كتير كوقت ومجهود ذهنى وطبعا بيديك افكار كتير ممكن تعملها فى التوزيع بتاعك غير لما توزع بالرسم .

...................................................................................................

رابعا المديولات والاصوات : فيه ملايين المديولات والاصوات فى العالم المهم انت محتاج ايه انواع المزيكا اللى انت بتشتغلها وانواع المزيكا احنا هنتكلم عليها فى موضوع لوحده عن استايلات المزيكا المختلفة والالات المستخدمة فى كل استايل وتكنيك اللعب لكل اله فى كل شكل مزيكا وامثلة اغانى على كل شكل واشهر الاشكال فى مصر والوطن العربى كل ده هنتكلم عنه ان شاء الله فى المواضيع الجاية

المهم نرجع لموضوعنا المديولات هقولكم دلوقتى اشهر الشركات للاصوات واللوبس 

والشركات دى هى اللى شغال عليها اشهر الموزعين توما وطارق مدكور واحمد ابراهيم .

Sampletank

Cakewalk

Spectrasonic

Best Service

Hypersonic

Vienna

Kontakt

Big Fish Audio

Loop Masters

Earth Moments

Modernbeats

وكتيييير جدا بس انت افهم دول الاول واعرف استخدامهم كويس . 

كدة ياجماعة احنا اتكلمنا عن اهم الحاجات اللى ممكن تخليك موزع فى الدروس الجاية ان شاء الله هنتكلم بقى عن ازاى تبقى موزع محترف 

اسرار التوزيع الموسيقى

مصطلحات المزيكا والموزعين

ازاى توزع لحن يجيلك

ازاى تعرف تعمل اشكال المزيكا المختلفة باحتراف

ازاى تعمل الشكل المناسب للحن

................

إقرأ المزيـــد